අද (31) විහාර මහාදේවී රංගපීඨයේ පැවති කාන්තා සමුළුව අමතමින් ඒ මහතා මේ බව පැවසීය.
එහිදී ඔහු වැඩිදුරටත් මෙසේද පැවසූ බව පොදු අපේක්ෂකවරයාගේ මාධ්‍ය ඒකකය නිකුත් කළ නිවේදනයක සඳහන්ය.
රාජපක්ෂ පාලනය නීතියේ ආධිපත්‍ය අහිමි කර තිබේ. ස්ත්‍රී දූෂණ, විශාල වශයෙන් වර්ධනය වී ඇත. ඔවුන්ට සමහර අවස්ථාවලදී රාජ්‍ය රැකවරණය පවා ලැබේ. කාන්තාවකට ලැබිය යුතු සියලු සමාජ අයිතිවාසිකම් එක්සත් ජාතීන්ගේ ප්‍රඥාප්තිය පරිදි ආණුඩුක්‍රම ව්‍යවස්ථාවකට අවශ්‍යය. ශ්‍රේෂ්ඨාධිකරණ අගවිනිසුරුවරියක් ලෙස ශිරාණි බණ්ඩාරණායක මහත්මිය පත්වූවාය. එය අගවිනිසුරුවරියක ලෙස කාන්තාවක පත් වු පළමු අවස්ථාවයි. අරලියගහ මන්දිරයේ සිට අධිකරණයේ නඩු තීන්දු වෙනස් කිරීමට නොහැකි වූ විට බොරු චෝදනා ඉදිරිපත් කර ඇයට අගෞරව කිරීම මේ රටේ සමස්ත මව්වරුන්ටම අගෞරව කළ අවස්ථාවක් බව ද මෛත්රිපාල සිරිසේන මහතා පෙන්වාදුන්නේය.
මෙම අවස්ථාවට සම්බන්ධ වු ජාතික හෙළ උරුමයේ සභාපති පූජ්‍ය අතුරලියේ රතන හිමියන්.
අද මව්වරුන්ගේ දුක්ඛිත භාවය නිසා ඔවුන් විදේශ රටවල වහල් සේවකයන් ලෙස රැකියා කරනවා. විදේශ රැකියාවල යෙදෙන කාන්තාවන්ගෙන් ඩොලර් බිලියන 5ක් පමණ ලංකාවේ ආර්ථිකයට ලැබේ. මැදපෙරදිග ඇතුළු අනෙකුත් රටවලට මව්වරුන් පිටත් කිරීමේදී රාජ්‍යතාන්ත්‍රික භාවයත්, අචාරධර්ම හා ප්රතිපත්ති වල සිට කටයුතු කළයුතු බවත්, අප රජයට ප්රකාශ කළත් එය කිසිවිටෙකත් ඔවුන් සිදුනොකළ බවත් අතුරලියේ රතන ස්වාමීන් වහන්සේ පෙන්වාදුන්නේය.
එම අවස්ථාවට සම්බන්ධ වු කලා ශිල්පිණී රේණුකා බාලසූරිය මහත්මිය.
මම නිතරම දේශපාලන වේදිකාවට නැග්ග කෙනෙක් නොවේ. නමුත් රටට අකටයුත්තක් සිදුවන හැමවිටම දේශපාලන වේදිකාවට යොමුවෙනවා. මෛත්රිපාල සිරිසේන මහතාගේ ජයග්‍රහණය මා දකිනවා. වැලි, ගඩොල්, සිමෙන්ති වලට සමාජයක් හදන්න බෑ. එහි ජිවත් වෙන්න යහපත් මිනිසුන් සිටිය යුතුයි. මවක් තම පුතා ලැම්බෝගිනි කාර් එකක යනවාට වඩා සත්‍යය වෙනුවෙන් ඉදිරියෙන් සිටගත හැකි පුරවැසියෙක් වෙනවට සියලූ මව්වරුන් කැමතියි, මම සියලූ මව්විවරුන්ට ආරධනා කරනවා මෛත්‍රිපාලනයක් උදා කිරීමට එක්වන ලෙස යැයි ඇය සඳහන් කළාය.
මෙම අවස්ථාවට සම්බන්ධ වු අනෝමා ෆොන්සේකා මහත්මිය.
‘‘වසර 30ක් තිස්සේ රණවිරු බිරිඳක් ලෙස එහි දුක දරාගත්තා.වසර දෙකාහාමාරක් සිර ගත කළ සැමියෙකුගේ බිරිඳ ලෙස ජිවත් වුණා. එනිසා මට මේ ගැන කතා කරන්න අයිතියක් තියෙනවා. මීට පෙර කාන්තාවක් ලෙස සන්ධ්‍යා එක්නැලිගොඩ මහත්මිය, හිටපු අගවිනිසුරුවරිය වන ශිරාණි බණ්ඩාරනායක මැතිතුමිය වැනි අයට අසාධාරණකම් සිදු වුණා. අද අලූත් පරපුරටත් ඒ තත්ත්වය උදා වෙමින් තිබෙනවා. හිරුණිකා, සෝලංගආරච්චි මහත්මිය වගේ අයටත් ඒ තත්ත්වයට මුහුණදෙන්නට සිදු වී තිබෙනවා. ඒනිසා මේ ක්‍රමවේදය වෙනස් කළ යුතුයි.
