නිධානයක් ගොඩදාන්න ගිය හිමිනම ඇතුළු 13 ක් දැලේ

මහකුඹුක්කඩවල - කොහොඹගස් යාය ප්‍රදේශයේ අක්කර 18 ක් විනාශ ඉඩමක් මැද නිධානයක් ගොඩ ගැනීමට උත්සහ කළ බව කියන භික්ෂුන් වහන්සේ කෙනෙකු ඇතුළු 13 දෙනෙකු මුන්දලම මුන්දලම පොලීසිය විසින් අත්අඩංගුවට ගෙන තිබේ.

ඊයේ (29)කළ වැටලීමකදී මොවුන් අත්අඩංගුවට ගෙන ඇති බව අද දෙරණ වාර්තාකරු පවසයි.

අත්අඩංගුවට ගෙන ඇති පිරිස අතර කාන්තාවන් දෙදෙනෙකු සහ කුඩා පිරිමි ළමයෙකුද වන බවත්,මොවුන් පැමිණි බව කියන වෑන් රථයක් හා ත්‍රී රෝද රථයක්ද පොලිස් බාරයට ගෙන ඇති බවත් සඳහන්ය.

පොලීසිය විසින් වැටලීම සිදු කරන විට අඩි 15 ක් පමණ ගැඹුරට කැණීම් කටයුතු කර තිබී ඇති අතර එම ස්ථානයේ තිබී වතුර මෝටරයක්,බෙර දෙකක්,බහිරව පුජාව සදහා යොදා ගන්නා මල් බුලත් තට්ටුවක් ඇතුළු දෑ පොලිස් බාරයට ගෙන ඇති බව අප වාර්තාකරු කියා සිටියි.

අත්අඩංගුවට ගෙන ඇති භික්ෂුන් වහන්සේ කුලියාපිටිය - කිතලව ප්‍රදේශයේ දේවාලයක් පවත්වා ගෙන යන වයස අවුරුදු 30 ක පමණ අයෙකු බව කියැවෙයි.

සෙසු සැකකරුවන් සැකකරුවන් අතර කුලියාපිටිය සහ බොරලැස්ස පදිංචිකරුවන් වන අතර ඔවුන් එකම පවුලේ අයවළුන් බව පොලීසිය විසින් අනාවරණය කරගෙන තිබේ.

ඔවුන් සමග අත්අඩංගුවට පත් වී ඇති කුඩා පිරිමි දරුවා දක්ෂ බෙර වාදකයෙකු බව පොලීසිය කියයි.

කැණීම් කටයුතු කර ඇති ස්ථානයේ මැණික් තිබෙන බවට තමන්ට අනාවරණය වී ඇති බව බව සැකකරුවන් පොලීසිය හමුවේ පවසා ඇත.

මේ දිනවල ඇද හැළෙන වැසි නිසා අවට පදිංචිකරුවන්ට නොදැන්න පරිදි නිධානය ගොඩ දැමීමට සැකකරුවන් සුදානම් වී සිට ඇති බවද පොලීසිය කියයි.

අත්අඩංගුවට ගෙන ඇති සැකකරුවන් පුත්තලම දිසා අධිකරණයට ඉදිරිපත් කිරීමට නියමිතව ඇත.

පුත්තලම කොට්ඨාස බාර ජ්‍යෙෂ්ඨ පොලිස් අධිකාරී සෙනරත් පද්මලාල් සඳුන්ගහවත්ත,කල්පිටිය සහකාර පොලිස් අධිකාරී මනෝජ් රණගල යන මහත්වරුන්ගේ උපදෙස් මත මුන්දලම පොලිස් ස්ථානාධිපති ප්‍රධාන පොලිස් පරීක්ෂක ලලිත් සඳසිරි,උප පොලිස් පරීක්ෂකවරුන් වන එම්.ඩී.සරත්,සුභසිංහ,පොලිස් සැරයන් 41340 අමිත්,පොලිස් කොස්තාපල්වරුන් වන 59795 නිශාන්ත,33514 ජයවර්ධන,54756 බර්ෂාඩ්,50602 අමල්,පොලිස් සැරයන් රියදුරු 8596 පාලිත යන නිලධාරීන් විසින් මෙම වැටලීම සිදු කර තිබේ.