බෞද්ධ සම්මේලනය ළඟ පෙරහැරක් තිබෙන බව ආරංචි වී එම ස්ථානයට ගිය බවත්, කවුරුවත් අපට අධිකරණ නියෝග පෙන්නුවේ නැති බවත්, බොදුබල සේනා සංවිධානයේ මහලේකම් පූජ්‍ය ගලාගොඩඅත්තේ ඥානසාර හිමියන් පවසයි.
අපි එම ස්ථානයට ගිය විට පොලීසියේ මහත්වරුත් පැත්තකට වී සිටි බවත්, අපිට හම්බවුණේ නැත්තේ ගිලන්පස විතරක් බවත්, උන්වහන්සේ කියා සිටියේ කොළඹදී අද පස්වරු‍ෙව් පැවැති මාධ්‍ය හමුවකදීය.
අල්ලස් කොමිසම ඉදිරිපිට විරෝධතා පැවැත්වීම වළක්වමින් උසාවි නියෝගයක් ලබාදී තිබියදී එසේ සිදුකළේ මන්දැයි මාධ්‍යවේදියෙකු ඇසූ ප්‍රශ්නයකට පිළිතුරු ලෙස උන්වහන්සේ ඉහත අදහස් පළ කළේය.
වත්මන් ආණ්ඩුවේ දින 100 අදින් අවසන් බවත්, එහි හොඳ වැඩ තිබුණත් එක වැඩක්වත් සම්පූර්ණ කර ගැනීමට නොහැකි වූ බවත්, දැන් මෙම ආණ්ඩුව පැටලිච්චි නූල් බෝලයක් හා සමාන නිසා කඩිනමින් විසුරුවා හැරිය යුතු බවත්, උන්වහන්සේ පැවසීය.
යුද විරුවන් අත්අඩංගුවට ගැනීම නතර කළ යුතු බවත්, සෑම දෙයක්ම සංදර්ශන පමණක් බවත්, වෙලේසුදාගේ සංදර්ශනයත් හරියට පින්නවල අලි සංදර්ශන වගේ බවත්, කියා සිටි උන්වහන්සේ “ කෝ අර වෙලේ සුදා” යනුවෙන්ද කියා සිටියේය.
දූෂණයයි භීෂණයයි දෙකම තිබූ මෙරටින් 2009දී මහින්ද රාජපක්ෂ මහතා භීෂණය තුරන් කළ බවත්, කොළඹ ලස්සන කළ මිනිස්සු දැන් අත්අඩංගුවට ගන්නා බවත්, ඔවුන්ට අත තබා ප්‍රශ්න ඇති කර නොගන්නැයි ආණ්ඩුවට අවධාරණය කරන බවත්, උන්වහන්සේ එහිදී වැඩිදුරටත් පැවසීය.
Post a Comment