කූරගල පුරාවිද්‍යා භූමියට නීති විරෝධීව ඇතුළුවීමට උත්සාහ කළ බවට චෝදනා එල්ල වූ සිහල රාවය සංවිධානයේ පූජ්‍ය අක්මීමන දයාරතන හිමි ඇතුළු භික්ෂූන් වහන්සේ 6 නමක් සහ පුද්ගලයින් 17 දෙනෙකු ඇප මත මුදා හැර තිබේ.
බලංගොඩ මහේස්ත්‍රාත් අධිකරණය මෙම නියෝගය ලබාදුන් බව අද දෙරණ වාර්තාකරු සඳහන් කළේය.
අධිකරණය විසින් ලබාදී තිබූ වාරණ නියෝගයක් නොසලකමින් පසුගිය 04 වන දින අදාළ භික්ෂූන් වහන්සේ ඇතුළු පිරිසක් කූරගල පුරාවිද්‍යා භූමියට ඇතුළුවීමට උත්සාහ කළ බවට චෝදනා කරමින් බලංගොඩ පොලිසිය මෙම පැමිණිල්ල ඉදිරිපත් කර තිබුණි.
අදාළ පිරිසට අද දිනයේ අධිකරණය හමුවේ පෙනී සිටින ලෙස නොතීසි නිකුත් කර තිබූ බව අද දෙරණ වාර්තාකරු පැවසුවේය.
ඒ අනුව රුපියල් දෙලක්ෂ 50,000 බැගින් වූ ශරීර ඇප මත ඔවුන් මුදා හැරීමට අධිකරණය නියෝග කර ඇත.
සිද්ධියට අදාළ නඩුව සැප්තැම්බර් මස 29 වැනිදා යළි විභාගයට ගැනීමට නියමිතය.
Post a Comment