දේශපාලනඥයින් විතරක් නොව ඔවුන්ගේ නෝනලාද දරුවන්ද මේ රජයෙන් පරිස්සම් කරගත යුතුව ඇති බව හිටපු ජනපති මහින්ද රාජපක්ෂ මහතා පවසයි.
එකිනෙකා මේ විදිහට අත්අඩංගුවට ගැනීමේ කටයුතු සිදුවන බවත්,මෙම වෛරීය දේශපාලනය නිමා කළ යුතුව ඇති බවත් රාජපක්ෂ මහතා සඳහන් කළේය.
හිටපු අමාත්‍ය විමල් වීරවංශ මහතාගේ බිරිඳවන ශෂි වීරවංශ මහත්මියගේ සුව දුක් විමසා බැලීම සඳහා අද (27) කොළඹ ජාතික රෝහලේ ගෙවන වාට්ටුවට පැමිණ පිටත්වන අවස්ථාවේදී ඔහු මේ බව කියා සිටියේය.
මෙම වෛර සහගත දේශපාලනය ඉතා වැරදි බවත්,තමන් ඒ ආකාරයෙන් කිසිවෙකුගෙන් පළිනොගත් බවත්, එහෙම කළ බවට කිසිවෙකුටත් තමාට ඇඟිල්ල දිගු කළ නොහැකි බවත් රාජපක්ෂ මහතා සිහිපත් කළේය.
එසේ වුවද බොහෝ දෙනෙකුට ඇඟිල්ල දිගු කිරීමට තමාට හැකි බවද ඔහු අවධාරණය කළේය.
මඩ ප්‍රහාර දියත් කොට ව්‍යාජ චෝදනා ඉදිරිපත් කොට මෙලෙස කටයුතු කිරීම කනගාටුදායක බවද හෙතෙම පෙන්වාදුන්නේය.
මෙම අවස්ථාවට එක්වෙමින් හිටපු අමාත්‍ය විමල් වීරවංශ මහතා කියා සිටියේ තම බිරිඳ ක්‍රමයෙන් සුව අතට පත්වන බව හා පසුගිය කාලයේ දිගින් දිගටම එල්ලවුණු පීඩනය මෙම රෝගීවීමට ප්‍රධාන වශයෙන් බලපෑ බවයි.
Post a Comment