ඊයේ (16) සවස දුම්මසූරිය - බිබිලාදෙණිය විහාරස්ථානය ආසන්නයේදී මෙම ඝාතනය සිදුවී ඇත.
ඝාතනයට ලක්ව ඇත්තේ දුම්මලසූරිය - බිබිලාදෙණිය විහාරස්ථානය ආසන්නයේ පදිංචිව සිටි මංජුලා සුභාෂිණී (අවු:24) නම්වූ තිදරු මවකි.
ඝාතනය සම්බන්ධයෙන් පොලීසිය විසින් බිබිලාදෙණිය පදිංචිකරුවන් දෙදෙනෙකු අත්අඩංගුවට ගෙන ඇති අතර ඉන් එක් සැකකරුවෙකු 37 හැවිරිදි අයෙකි.
ඝාතනයට ලක්වී ඇති කාන්තාව තිදරු මවක වන අතර ඇයට වයස අවුරුදු 12 ක දියණියක සහ වයස අවුරුදු 06 සහ 03 වශයෙන් වූ පිරිමි දරුවන් දෙදෙනෙකු සිටින බව අද දෙරණ වාර්තාකරු පවසයි.
මීට වසර කීපයකට පෙර සැමියා ඇය අතහැර ගොස් ඇති අතර ඉන් පසුව ඇය හුදකලාව වාසය කර ඇතත් විටින් විට පිරිමින් කීප දෙනෙකු ඇසුරු කර ඇති බව පොලීසිය විසින් අනාවරණය කරගෙන ඇත.
ඊයේ (16) සවස ඇය තම මව සමග මහ මග ගමන් කරමින් සිටින විට සැඟවී සිට ඇති දෙදෙනෙකු තියුණු ආයුධයකින් ඇයට පහර දී ඇති බවත්,තම දියණිය බේරා ගැනීමට උත්සහ කළ මවද කැපුම් තුවාල සහිතව කුලියාපිටිය මූලික රෝහලට ඇතුළත් කර ඇති බවත් සඳහන්ය.
කෙසේ වෙතත් කැපුම් තුවාල සහිතව ඇද වැටී ඇති කාන්තාව එම ස්ථානයේදීම මිය ගොස් ඇත.
මෙම මරණය සම්බන්ධයෙන් වූ මූලික මහේස්ත්‍රාත් පරීක්ෂණය කුලියාපිටිය වැඩ බලන මහේස්ත්‍රාත් ජෙනී අමරසිංහ මහත්මිය විසින් සිද්ධිය වූ ස්ථානයේදී ඊයේ සවස පවත්වන ලදි.
මිය ගොස් ඇති කාන්තාවගේ මෘත ශරීරය සම්බන්ධයෙන් පශ්චාත් මරණ පරීක්ෂණය පවත්වන ලෙස කුලියාපිටිය අධිකරණ වෛද්‍ය නිලධාරීවරයාට නියෝග කළ වැඩ බලන මහේස්ත්‍රාත්වරිය අත්අඩංගුවට ගෙන ඇති සැකකරුවන් අධිකරණය වෙත ඉදිරිපත් කරන ලෙස පොලීසියට නියම කළාය.
දුම්මලසූරිය පොලීසිය වැඩිදුර විමර්ශන කටයුතු කරගෙන යයි.
Post a Comment