පකිස්ථානයේ පෙෂාවර් නුවර පාසලකට එල්ලවු ත්‍රස්ත ප්‍රහාරය හෙළා දකින බව මෙරට රජය පවසයි.
නිවේදනයක් නිකුත් කරමින් විදේශ කටයුතු අමාත්‍යංශය මේ බව ප්‍රකාශ කර තිබේ.
තලෙයිබාන් සටන්කාමීන් එල්ල කළ ප්‍රහාරයක් හේතුවෙන් එම පාසලේ දරුවන් 132 දෙනෙකු ඇතුළු පුද්ගලයින් 141 දෙනෙකු මිය යන ලදී.
පාසල් දරුවන් ඉලක්ක කර ගනිමින් එල්ලකරන මෙවැනි ප්‍රහාර මගින් ත්‍රස්තවාදීන්ගේ දරුණු බව පෙන්නුම් කරන බව විදේශ කටයුතු අමාත්‍යංශය පවසයි.
ප්‍රහාරය සම්බන්ධයෙන් දැඩි ලෙස කණගාටුව පළ කරන බව ද අදාළ නිවේදනය මගින් ප්‍රකාශ කර තිබේ.
දශක 03 කට අධික කාලයක් ත්‍රස්තවාදයට මුහුණ දුන් ලාංකිකයින්, පකිස්ථාන වැසියන් මුහුණ දෙන මෙවැනි දරුණු ප්‍රහාර සම්බන්ධයෙන් ශෝකය පළ කරන බව ද අදාළ නිවේදනයේ සඳහන්ය.
ත්‍රස්තවාදය පිටුදැකීම සඳහා ශ්‍රී ලංකා රජය සැමවිටම පකිස්ථානය සමඟ එක්ව සිටින බව විදේශ කටයුතු අමාත්‍යංශය නිකුත් කළ නිවේදනයේ වැඩිදුරටත් සඳහන් වෙයි.
Post a Comment