රථ වාහන වැරදි සඳහා වන දඩ මුදල් ජංගම දුරකථන හා ක්‍රෙඩිට් කාඩ් මගින් ගෙවීමේ ක්‍රියාවලියක් හඳුන්වාදීමට පොලීසිය තීරණය කර තිබේ.
පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී අජිත් රෝහණ මහතා සඳහන් කළේ එහි පළමු අදියර ලෙස ජංගම දුරකථන මගින් මුදල් ගෙවීමේ ක්‍රියාවලිය හඳුන්වාදෙන බවයි.
කොළඹ අද පැවති මාධ්‍ය හමුවකට එක්වෙමින් අජිත් රෝහණ මහතා මෙම අදහස් පල කළේය.
අදාළ වැඩසටහන මේ වසර අවසානයේ සිට ක්‍රියාත්මක කිරීමට සැලසුම් කර තිබේ.
ඕනෑම ජංගම දුරකථන ජාලයකින් අදාළ දඩ මුදල් ගෙවීම සඳහා අවස්ථාව සලසා දෙන බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී අජිත් රෝහණ මහතා ප්‍රකාශ කළේය.
රථ වාහන වැරදි සම්බන්ධයෙන් දඩ මුදල් ගෙවීමේ දී රියදුරන් මුහුණදෙන දුෂ්කරතාව සැලකිල්ලට ගනිමින් මෙම නව වැඩපිළිවෙළ ක්‍රියාත්මක කිරීමට තීරණය කළ බව අජිත් රෝහණ මහතා ප්‍රකාශ කළේය.
Post a Comment