රත්නපුර අද පස්වරුවේ පැවැති ජනරැලියට මහින්ද රාජපක්ෂ මහතා විසින් එවන ලද සුබපැතුම් පණිවිඩයේ මේ බව සඳහන් වෙයි.
එකී සුබපැතුම වැඩිදුරටත් පහත පරිදිය.
ගෞරවනීය මහා සංඝයා වහන්ස/ පුජකතුමනි,
එක්සත් ජනතා නිදහස් සන්ධානයේ නායකවරුන් ප‍්‍රමුඛ
ගරු පාර්ලිමේන්තු මන්ත‍්‍රීවරුනි, පළාත්සභා මන්ත‍්‍රීවරුනි,
නගර සභා/ප‍්‍රාදේශිය සභා සභාපතිවරුනි, මන්ත‍්‍රීවරුනි,
ආදරණීය මිත‍්‍රවරුනි,
‘‘දිනූ නිදහස අනතුරේ’’ තේමාය යටතේ පළමුව නුගේගොඩදී ද අනතුරුව මහනුවරදී ද මම මෙලෙස ඔබට සුබ පැතුවෙමි. රුවන්පුරයට ඒකරාශී වූ දස දහස් සංඛාත ඔබට සුබ පැතීමට අද තෙවැනිවත් මා භාග්‍යවන්තයකුව සිටී.
මාගේ පළමු යුතුකම වනුයේ අප ආදරණිය මාතෘභූමියේ ඒකීයභාවය වෙනුවෙන් 2005 සිට වසර 10 කාලයක් මා සමග ඍජුව පෙනී සිටි මේ දුෂ්කර මොහොතේ ද මා අතනොහැර සිටින ඔබ සියළු දෙනා වෙත මාගේ කෘතවේදීත්වය ප‍්‍රකාශ කිරීමයි. මිත‍්‍රවරුනි මාතෘභූමියට ආදරය කළ ඔබ නොසිටියානම් නැසැකවම බෙදුම්වාදයට එරෙහි අරගලය පරාජය වීමට ඉඩ තිබුණි. දෙවැනිව අවලාද හා චරිත ඝාතන හා බොරු බේගල් ඇද බාමින් බෙදුම්වාදයේ සුරතලූන් වූ ඇතැම් විදේශ රාජ්‍ය දියක් කළ කුමන්ත‍්‍රණ හමුවේ පසු නොබැස පසුගිය ජනාධිපතිවරණයේ දී මා කෙරෙහි විශ්වාසය තැබූ ඔබ සියලූ දෙනා වෙත නැවත නැවතත් මාගේ ගෞරවය ප‍්‍රකාශ කොට සිටිමි.
මිත‍්‍රවරුනි, මේ ඓතිහාසික රුවන්පුරයේ කොළොන්න, රක්වාන, පැල්මඩුල්ල,නිවිතිගල,බලංගොඩ, කලවාන, ඇහැළියගොඩ හා රත්නපුර සියලූ මැතිවරණ කොට්ඨාසයන්හි ජයග‍්‍රහණය බුලත්කොළය මත සහතික කලේ ඔබ විසිනි. ජාතික මතවාදය සබරගමුවේ ආත්මගරුත්වය ද රැකගැනීමට කැප වූ ඔබ සියළු දෙනා මා හදවතේ සදානුස්මරණිය ලෙස තැන්පත්ව සිටින බව දැනුම් දීමට කැමැත්තෙමි.
එක්සත් ජාතික පක්‍ෂ හවුල් ආණ්ඩුවේ ජනතා විරෝධී පාලනය පෙරලා දැමීමේ මූලික අරමුණ පෙරදැරිව ශ‍්‍රී ලංකා නිදහස් පක්‍ෂයේ ආත්මගරුත්වය වෙනුවෙන් ද එක්සත් ජනතා නිදහස් සන්ධානයේ සහෝදරත්වය වෙනුවෙන් ද මා කෙරෙහි තිබෙන ලෙන්ගතු බව ප‍්‍රකාශ කිරීම සඳහා ද මෙහි රොක් වූ ඔබ සියළු දෙනා වෙත මාගේ නොසැලෙන මිත‍්‍රත්වය පුන පුනා ප‍්‍රකාශ කිරීම සඳහා ද මම මේ අවස්ථාව උපයෝගී කරගනිමි.
මිත‍්‍රවරුනි, අද රටේ ජනමතය කුමක් වුවද ජනවාරි 08 වැනිදා ජාත්‍යන්තර කුමන්ත‍්‍රණකරුවන් අපට වඩා ශක්තිමත් වූ බව අපි පිළිගත යුතුව තිබේ. එමෙන්ම මැතිවරණයෙන් පරාජය වුව ද අපි කිසිවෙකු දේශපාලනයෙන් පරාජය කළ නොහැකි බව සතුරාට අවධාරණය කළ යුතුව තිබේ. එසේම පරාජිතයන් වුව ද නිවටයන් නොවන බව අප සතුරාට ඔප්පු කළ යුතුව තිබේ. බෙදුම්වාදයේ රූකඩ හා හෙවනැලි ජාත්‍යන්තර තලයේ හෙල්මන් කරන මෙවැන් පසුබිමක අපි අපගේ අධිෂ්ඨානය වඩාත් මුවහත් කර ගත යුතුව තිබේ.
ලෝකයේ දියුණු සංවර්ධිත රාජ්‍යයක් වශයෙන් ගොඩනැගෙමින් තිබූ අප ආර්ථිකය මුළුමනින්ම පාහේ ඇනහිටීම පිළිබඳව ද අපි එක්සත් ජාතික පක්‍ෂ සභාග ආණ්ඩුවේ අවධානය යොමු කළ යුතුය. එයට එරෙහි වන බව ද රත්නපුරයේ සිට ඔබ හඩනගා ලෝකයාට පැවසිය යුතුය.
එක්සත් ජනතා නිදහස් සන්ධානයේ අප මිතුරන් මෙන්ම මෙහි රැස්ව සිටින අතිබහුතර ශ‍්‍රී ලංකා නිදහස් පක්‍ෂයේ ආදරණීය පාක්ෂිකයන් බව මම දනිමි. එදා ජයවර්ධන-පේ‍්‍රමදාස දුර්දාන්ත පාලනයට එරෙහිව ශ‍්‍රී ලංකා නිදහස් පක්‍ෂය මුළු ගැන්වී සිටියදී කොළඹ සිට කතරගම දක්වා දියත් කළ පාද යාත‍්‍රාව මට අද මෙන් මතකය. කකුලේ දිය පට්ට කඩමින් අගුපිල වල නිදා ගනිමින් ගිය ඒ ඓතිහාසික ගමනේ මා සමීපයෙන්ම සිටි සගයකු වූ වාසුදේව නානායක්කාර සහෝදරයාට ගෞරවයක් වශයෙන් මෙනම් අඹිලිපිටිය මහ විදුහලේදී ඝාතනයට ලක් වූ දරුවන්ගේ ලේ තැවරුනු කමීස ඇදගෙන පෙළපාලි ගිය අඹිලිපිටිය මව්වරුන් හා පියවරුන් මම අද දවසේදී ගෞරවයෙන් සිහිපත් කරමි. දරුදුක කවියකට පෙරළා ඔවුන් පාදයාත‍්‍රාවේ රැගෙන ගිය බැනරය මට තාම මතකය.
‘මූණු සයකි අත් දොලසකි මයුරා පිට වාහනේ
රුහුණු රටේ කතරගමේ කදිර දේව සාමිනේ
මුණු බැදන් අපේ දරුවන් උස්සන් ගිය කාරණේ
වානු බැරිය සුන්කල මැන පේ‍්‍රමදාස පාලනේ’’
මිත‍්‍රවරුනි, අපි ශ‍්‍රී ලංකාවද ශ‍්‍රී ලංකා නිදහස් පක්‍ෂයද රැකගැනීම සඳහා අප‍්‍රමාණව සටන් කළෙමු. එකී උත්සාහයන් කිසි ලෙසක අපතේ යාමට ඉඩ දිය යුතු නොවේ. අපගේ ජයග‍්‍රහණ ගැන මෙන්ම අපගේ අඩුපාඩු ගැනද අතපසුවීම් ගැනද ඉගෙන ගැනීම සඳහා සියළු දෙනා නිහතමානී විය යුතුය, අවංක විය යුතුය.
මව්බිමේ එකීයභාවය ද සංවර්ධනයද ආත්මගරුත්වයද අභිමානයද සුරකින නිවහල් ශ‍්‍රී ලංකාවක් ගොඩනැගීම සඳහාද ඒ වෙනුවෙන් කැපවෙන ශ‍්‍රී ලංකා නිදහස් පක්‍ෂය ගොඩනැගීම සඳහාද අපි එක්සත්ව ගමනු කරමු. ලෝක දේශපාලන සිතියමේ ඉහළින්ම අපගේ අභිමානවත් ජාතික ධජය ලෙලදිය හැකි දේශයක් ගොඩනැගීමේ උතුම් අරමුණ වෙනුවෙන් අපි එක්ව සටන් කරමු.
සියලූ දෙනාය සුභ අනාගතයක් වේවා
තෙරුවන් සරණයි
සියලූ දෙවි පිහිටයි
මහින්ද රාජපක්ෂ
හිටපු ජනාධිපති
Post a Comment