මැතිවරණ කටයුතු සඳහා ලංගම බස් රථ යොදාගැනීම සම්බන්ධයෙන් මැතිවරණ නිරීක්ෂණ සංවිධාන ජාතික ගමනාගමන කොමිසම වෙත පැමිණිලි කර තිබේ.
පැෆ්රල් සංවිධානයේ විධායක අධ්‍යක්ෂ රෝහණ හෙට්ටිආරච්චි මහතා පවසන්නේ පානදුර ප්‍රදේශයේ පැවැත්වෙන මැතිවරණ ප්‍රචාරක රැළියක් සඳහා යොදාගැනීමට ලංගම බස් රථ 500ක් පමණ සූදානම් කර ඇති බවට තොරතුරු ලැබී ඇති බවයි.
අදාළ බස් රථ එම කාර්යයන් සඳහා ලබාගෙන ඇති කාර්යය පටිපාටිය සම්බන්ධයෙන් දැනුම්වත් කරන ලෙස තම සංවිධානය ලිපියක් යොමුකරමින් ලංකා ගමනාගමන මණ්ඩලයෙන් ඉල්ලා සිටි බව රෝහණ හෙට්ටිආරච්චි මහතා සඳහන් කළේය.
මීට අමතරව ඊයේ අකුරැස්සේ දී පැවති ප්‍රචාරක රැළියක සැරසිලි කටයුතු සඳහා බන්ධනාගාර රැඳවූවන් යොදාගෙන ඇති බවට පැමිණිල්ලක් ලැබී තිබෙන බව ද ඔහු පැවසීය.
ලංගම බස්රථ සම්බන්ධයෙන් කරුණු විමසීමට ජාතික ගමනාගමන මණ්ඩලයේ සභාපති ශෂී වෙල්ගම මහතා සම්බන්ධ කරගැනිමට දැරූ උත්සහය සාර්ථක වූයේ නැත.
බන්ධනාගාර රැඳවූවන් මැතිවරණ කටයුතු සඳහා යොදාගැනීම සම්බන්ධයෙන් එල්ල වන චෝදනා පිළිබඳ පුනරුත්ථාපන හා බන්ධනාගාර ප්‍රතිසංස්කරණ අමාත්‍ය චන්ද්‍රසිරි ගජධිර මහතා සහ බන්ධනාගාර කොමසාරිස් ජනරාල් චන්ද්‍රරත්න පල්ලේගම මහතාගෙන් අද දෙරණ විමසීමක් කළේය.
එහිදී විෂයභාර අමාත්‍යවරයා සඳහන් කළේ ඒ පිළිබඳ සොයාබලා වාර්තා කරන ලෙස තමන් අදාළ නිලධාරින්ට උපදෙස් දුන් බවයි.
.jpg)
Post a Comment