අද(14) කොළඹදී පැවැති මාධ්‍ය හමුවකට එක්වෙමින් ජාතික නිදහස් පෙරමුණේ දේශපාලන මණ්ඩල සභික, මධ්‍යම පළාත් සභා මන්ත‍්‍රී නිමල් පියතිස්ස මහතා මේ බව සඳහන් කළේය.
එහිදී වැඩිදුරටත් අදහස් දැක්වූ නිමල් පියතිස්ස මහතා පහත පරිදි අදහස් දැක්විය.
පොදු අපේක්‍ෂක මෛත‍්‍රීපාල සිරිසේන මහතාගේ ජයග‍්‍රහණය වෙනුවෙන් කටයුතු කරන දේශපාලන පක්‍ෂ හා සංවිධානවල නායකයන් විසින් මේ වන විට සිදු කර ඇති එකිනෙකට පරස්පර විරෝධී ප‍්‍රකාශ පිළිබඳව පොදු ජනතාව පමණක් නොවෙයි, එම පක්‍ෂ හා සංවිධානවල සාමාජිකයන් හා හිතවතුන්ද දැඩි අවධානයක් යොමු කළ යුතුව තිබෙනවා. ජාතික හෙළ උරුමය වගේම මුජිබර් රහුමාන්ලා හා අසාත් සාලිලා අද මෛත‍්‍රීපාල සිරිසේන දිනවීමට කැප වී සිටිනවා. පරස්පර විරෝධී ගිවිසුම් රැසක් මේ නායකයන් මෛත‍්‍රීපාල සිරිසේන සමග අත්සන් කොට තිබෙනවා.
මේ හවුල මේ විදියට ගිහිල්ලා අවසානයේදී මේ රට අස්ථාවර කරන්නයි සූදානම් වන්නේ. එපමණක් නොවෙයි, දිනාගත් ජයග‍්‍රහණද ආපස්සට ඇදීමටයි ඔවුන් මේ සූදානම් වනනේ. දවසින් දවස එකිනෙකට පරස්පර විරෝධී කතා මේ හවුලේ නායක නායිකාවන් විසින් සිදු කරනවා. ඊයේ(13) සවස හිටපු ජනාධිපතිනි චන්ද්‍රිකා කුමාරතුංග අත්තනගල්ලේදී සිය සමීපතමයන් සමග විශේෂ සාකච්ඡාවක් සිදු කොට ඇති බව වාර්තා වෙනවා. එහිදී ඇය කියනවා, "අපි ගොඩනගන්න හදන්නේ එක්සත් ජාතික පක්‍ෂයේ බලයක් නොවෙයි. අපි ගොඩනගන්නේ විධායක බලතල සහිත අපේම බලයක් මිත‍්‍රවරුනි. ඒ විධායක බලය ලැබුණාට පසුව ආයෙත් ශ‍්‍රී ලනිපයේ නායකත්වය අපි අපේ අතට ගන්නවා" කියලා.
මේ තත්ත්වය එක්සත් ජාතික පාක්‍ෂිකයන් වගේම මේ රටට ආදරය කරන සියලූම ජනතාව හොඳින් තේරුම් ගත යුතුයි. තමන්ට මහින්ද රාජපක්‍ෂ පාලනයෙන් සිදු වූ මදිපුංචිකම් හේතුවෙන් හටගත් වෛරය පිරිමසා ගන්නයි මේ හවුල එකතු වී බලය ලබා ගන්න හදන්නේ. ඒ නිසා ඉතා පැහැදිලිව මේ අශුද්ධ සන්ධානය අද, "අලි - කොටි - නරි - ගෙඹි - ඔටු සන්ධානය" ලෙස හැඳින්විය හැකියි. මෙය එකිනෙකට පරස්පර විරෝධී මත දරන පිරිසකගේ අවස්ථාවාදී හවුලක් බව සක්සුදක් සේ පැහැදිලියි.
මේ හවුල විසින් ලබා දෙන නොයෙකුත් වරදාන, වරප‍්‍රසාද හේතුවෙන් ඇතැම් පිරිස් ඒ පැත්තට "ගෙඹි පිනුම්" පනින බව පෙනෙනවා. මා නියෝජනය කරන නුවරඑළිය දිස්ත‍්‍රික්කයේ නවීන් දිසානායකද එවැනි"ගෙඹි පිම්මක්" පැන්නා. ඔහු එජාපයේ සිට පැමිණ 2010 මහ මැතිවරණයේදී සන්ධානයෙන් පාර්ලිමේන්තුවට ගිය අයෙක්. ඔහු ඉතාමත් අකාර්යක්‍ෂම, අදක්‍ෂ මහජන නියෝජිතයකු ලෙසයි ගෙවී ගිය කාලය තුළ කටයුතු කළේ.
ඔහුට කිසිදු දැක්මක් තිබුණේ නැහැ. බහුජන පදනමක් ගොඩනගා ගත්තේ නැහැ. මම වලපනේ ප‍්‍රාදේශීය සභාවේ මන්ත‍්‍රීවරයකු ලෙස ඉටු කළ සේවයවත් ඔහුට ගෙවී ගිය වසර කිහිපය තුළ කැබිනට් අමාත්‍යවරයකු ලෙස ඉටු කිරීමට නොහැකි වූවා. මධ්‍යම පළාත් සභාවේ කෘෂිකර්ම අමාත්‍යවරයා ලෙස අමාත්‍යාංශයට වාර්ෂිකව ලැබුණු මිලියන 100ක මුදල අපට ඉතාමත් ඵලදායකව යෙදවීමට හැකි වුණා. කොතරම් බාධක තිබුණත් නිවැරදි දැක්මක් සහිතව, කැපවීමෙන්, පරිත්‍යාගයෙන්, කාර්යක්‍ෂමව කටයුතු කළොත් මහජන නියෝජිතයකුට තම පළාතේ ජනතාවට විශාල වැඩකොටසක් ඉටු කළ හැකියි.
අප ඒ බව ඔප්පු කර තිබෙනවා. නමුත් නවීන් දිසානායක අද කියනවා, "මට ප‍්‍රතිපාදන ලැබුණේ නැහැ. වැඩ කරන්න දුන්නේ නැහැ" කියා. නුවරඑළියේ අහිංසක ගොවි ජනතාවගේ ඡන්දය කොල්ලකාලා 2010දී පාර්ලිමේන්තු ගිහිල්ලා, කොළඹට වෙලා වරප‍්‍රසාද වරදාන භුක්ති විඳපු නවීන් දිසානායකට මම අභියෝග කරනවා, "හැකි නම් නියරක මීටර් 10ක් ඇවිදගෙන ගිහිල්ලා පෙන්වන්න"කියලා. එයා ආපසු එක්සත් ජාතික පක්‍ෂයට ගියේ ඊළග පාර්ලිමේන්තු ඡන්දයේදී සන්ධානයෙන් ඉල්ලූවොත් "කුජීත" වන බව දැනගෙනයි. "නවීන් දිසානායක, නුවරඑළිය දිස්ත‍්‍රික්කයේ ජනතාවට විශාල සේවයක් කරපු ගාමිණී දිසානායක මහත්තයාගේ පුතෙක්ද?" කියන සැකය ජනතාව තුළ ඇති වී තිබුණු තත්ත්වයක් මතයි ඔහු මේ ගෙඹි පිම්ම පැන්නේ. දැන් එයා, බලන්නත් කැත "ඔටු නැටුම්" නටනවා.
ඒ වගේම රාධක‍්‍රිෂ්ණන් හා දිගම්බරන් යන නියෝජ්‍ය අමාත්‍යවරුන් දෙදෙනාත් මෛත‍්‍රීපාල සිරිසේනගේ "කැඳ හැලියට" ගෙඹි පිම්මක් පැන්නා. මේ අය නියෝජ්‍ය අමාත්‍යවරුන් ලෙස ලැබුණු සියලූම වරප‍්‍රසාද ඉතාමත් මජර ලෙස භුක්ති වින්දා. මේ අයට වතුකරයේ ජනතාව වෙනුවෙන් යොදවන්න වාර්ෂිකව රුපියල් මිලියන 400 බැගින් විශේෂ ප‍්‍රතිපාදන ලැබුණා. ඔවුන්ගේ පක්‍ෂවල පළාත් සභා මන්ත‍්‍රීවරුන්ට වාර්ෂිකව රුපියල් කෝටිය බැගින් විශේෂ ප‍්‍රතිපාදන ලැබුණා. මේ සියල්ල අරගෙන තමයි ඔවුන් අන්තිම මොහොතේදී අනෙක් පැත්තට "බල්ටිය"ගැහුවේ.
ඔවුන් මේ විදියට එළියට ඇවිල්ලා කියලා තිබුණා,"වතුකරයේ ජනතාවගේ නිවාස ප‍්‍රශ්නය විසඳුවේ නැති නිසයි අපි එළියට ආවේ" කියලා. ඒක පට්ටපල් බොරුවක්. වතුකරයේ ජනතාවගේ නිවාස ප‍්‍රශ්නය කඩිනමින් විසඳීමේ වැඩපිළිවෙළක් දැනටමත් ක‍්‍රියාත්මක වෙනවා. නිවාස අමාත්‍යතුමන්ගේ නුවරඑළිය දිස්ත‍්‍රික් නියෝජිතයා විදියට මම හොඳින් දන්නවා, අපේ අමාත්‍යාංශය මගිනුත්, වැවිලි නිවාස භාරය විසිනුත් වතුකරයේ ජනතාවට ලයින් නිවාස වෙනුවට, තනි නිවාස ලබා දීමේ කඩිනම් වැඩපිළිවෙළක් ක‍්‍රියාත්මක වෙනවා. මෙවර අය - වැයෙන් වතුකරයේ ජනතාවගේ නිවාස ප‍්‍රශ්නය විසඳීමට නිවාස 50,000ක් ඉදිකිරීමට යෝජිතව තිබෙනවා.
ඇත්තෙන්ම රාධක‍්‍රිෂ්ණන්ලා, දිගම්බරන්ලා පොදු අපේක්‍ෂක දිනවන්න ගියේ නිවාස ප‍්‍රශ්නයක් නිසා නොවෙයි. අද මේ අයගේ දේශපාලන පක්‍ෂ මෙහෙයවන්නේ අසල්වැසි රටේ ඔත්තු සේවාව විසිනුයි. තමන් ඒ ඔත්තු සේවාවේ "ගැත්තෝ, ඉත්තෝ, කුක්කෝ" වී සිටින නිසයි මේ අය මෛත‍්‍රීපාල සිරිසේනට සහාය පළ කරන්නේ.
මේ අශුද්ධ හවුලට, බටහිර බලවතුන්, අසල්වැසි රටේ ඔත්තු සේවාව, ජාත්‍යන්තර රාජ්‍ය නොවන සංවිධාන ආදී රටට හතුරු සියලූ ජාත්‍යන්තර බලවේග උදවු කරනවා. ඒ ජාත්‍යන්තර බලවේගවලට අවශ්‍ය තමන්ගේ කුලී සේනාංකය වූ කොටි සංවිධානය විනාශ කරපු පලිය රාජපක්‍ෂ පාලනයෙන් ගන්න. ඔවුන් පලිය අරගෙන නිකං ඉන්නේ නැහැ. යළිත් මේ රට අස්ථාවර කරලා තමන්ට නැටවිය හැකි රූකඩ පාලනයක් හදා ගන්නයි ඔවුන්ට උවමනා.
මේ ජාත්‍යන්තර සහාය ලබන, "අලි - කොටි - නරි - ගෙඹි - ඔටු" අශුද්ධ සන්ධානය කොතරම් විෂකුරුද, කියා මේ රටේ ජනතාව තේරුම් ගත යුතුයි. යුද ජයග‍්‍රහණයෙන් පසුව රට තුළ ස්ථාවරභාවය ඇති කරලා සංවර්ධන මාවතක් ඔස්සේ රට ඉදිරියට ගෙන යෑමට මහින්ද රාජපක්‍ෂ පාලනය සමත් වී තිබෙනවා. අඩුපාඩු තිබිය හැකියි. ඒවා නිවැරදි කරගෙන ඉදිරියට යාමයි අවශ්‍ය. නමුත් මේ අශුද්ධ හවුල උත්සාහ ගනිමින් සිටින්නේ, රට අස්ථාවර කිරීමටයි. ඊට කිසිසේත්ම ඉඩ නොතැබිය යුතුයි. ලැබූ ජයග‍්‍රහණ රැක ගනිමින්, අලූත් ජයග‍්‍රහණ ලබා ගැනීමට මහින්ද රාජපක්‍ෂ ජනාධිපතිතුමන්ගේ ජයග‍්‍රහණය වෙනුවෙන් අත්වැල් බැඳ ගන්නා ලෙස රටට මිතුරු සියලූ ජනතාව වෙතින් ඉල්ලා සිටිනවා.
ජනාධිපති ධුර කාල දෙකක් නාස්ති කරපු චන්ද්‍රිකා කුමාරතුංග අද නාකි කිකිළියක් වගේ කෙකර ගානවා. නාකි කිකිළියන්ට කොතරම් කෙකර ගෑවත් බිත්තර දමන්න බැහැ. ඒක මේ රටේ බුද්ධිමත් ජනතාව තේරුම් ගත යුතුයි. ආත්ම කේන්ද්‍රීය වේදනාවන් මුල්කර ගෙන වෛරයෙන් ක්‍රෝධයෙන් ගොඩනැගුණු මේ අශුද්ධ හවුලට ජනාධිපතිවරණයේදී අන්ත පරාජයක් අත්කර දීමට මෙරට බුද්ධිමත් ජනතාව කටයුතු කරන බව අපගේ විශ්වාසයයි.
Post a Comment