ශ්‍රී ලංකා මුස්ලිම් කොංග්‍රසය ඉදිරි ජනාධිපතිවරණයේ දී සහය පල කරන්නේ කුමන අපේක්ෂකයාට ද යන්න පිළිබඳව අද පැවැති සාකච්ඡාවේදී ද එකඟතාවට පැමිණීමට නොහැකි වී තිබේ.
අමාත්‍ය රවුෆ් හකීම් මහතාගේ ප්‍රධානත්වයෙන් අද මහනුවර දී ශ්‍රී ලංකා මුස්ලිම් කොංග්‍රසයේ නියෝජිත හමුවක් පැවැත්වුණි.
ඊට ශ්‍රී ලංකා මුස්ලිම් කොංග්‍රසය නියෝජනය කරන පාර්ලිමේන්තු මන්ත්‍රීවරුන්, පළාත් සභා මන්ත්‍රීවරුන් සහ පළාත් පාලන ආයතන නියෝජිතයින් සහභාගී වී සිටි බව වාර්තා වෙයි.
එහිදි එක් පාර්ශවයක් ජනාධිපති මහින්ද රාජපක්ෂ මහතාට සහය පළ කළ යුතු බවට පවසා ඇති අතර තවත් පාර්ශවයක් පොදු අපේක්ෂක මෛත්‍රීපාල සිරිසේන මහතාට සහය පළ කළ යුතු බවට ප්‍රකාශ කර තිබේ.
මේ හේතුවෙන් එකඟතාවකින් තොරව සාකච්ඡා අවසන් වී ඇති අතර ඉදිරි දිනකදී සහය ලබාදෙන අපේක්ෂකයා පිළිබඳව දැනුවත් කිරීමට බලාපොරොත්තු වන බව අමාත්‍ය රවුෆ් හකීම් මහතා ප්‍රකාශ කර ඇත.
Post a Comment